Sunday, 6 August 2017

நல்ல பாடம் கற்றுத் தந்த துயரர்


தீவிர நோய்தாக்குதலின் போது , துயரர்களிடமிருந்து குறிகளை பெறுவது சற்று எளிதாக இருக்கும். பெரும்பாலான துயரர்கள் தங்களது குறிகளை மிகவும் சரளாகமாகவும் , துல்லியமாகவும் குறிப்பிடுவார்கள். நாம் தான் கவனத்துடன் இருந்து அவர்கள் கூறும் குறிகளையும், அறிகுறிகளையும் சேகரிக்க வேண்டும். தேவைப்படும் நேரத்தில் சரியான கேள்வியைக் கேட்டு உறுதி செய்து கொள்ள வேண்டும். ஆனால் , நாம் தொகுத்து வகைப்படுத்திக் கொள்ளும் குறிகள் சரியானதாகவும் , அந்த துயரரின் தனித்தன்மையை உள்ளடக்கியதாகவும் இருக்க வேண்டும். தவறும் பட்சத்தில் மருந்து தேர்வும் தவறாகி விடும். இப்படியொரு அனுபவம் சமீபத்தில் எனக்கு கிடைத்தது.


ஒரு ஆண் துயரர். திரு. M ;  வயது 48 . திடீரென்று வயிற்றில் கடுமையான  காற்று உப்பிசம். காலை எழுந்தவுடன் மூன்று முறை வயிற்றுப்போக்கு . அவரால் காலை உணவையும் சாப்பிடமுடியவில்லை. சிறுது சாப்பிட்டவுடன் குமட்டல் வந்துவிட்டது. நிறுத்திவிட்டார். தொண்டையில் உணவையும் , தண்ணீரையும் விழுங்கமுடியவில்லை. உள்ளே செல்லாமல் வெளியே வந்து விடுகிறது. வயிற்றின் மேல் பகுதியில் வலி இருக்கிறது என்று கூறினார். மனக்குறிகள் எதுவும் பிரதானமாக தென்படவில்லை. அதனால் அவரது குறிகளை கீழ்வரும் குறிமொழிகளாக குறித்துக் கொண்டேன்;

1.      Stomach; appetite; diminished; morning:  carb-v  chin gels
2.      Stomach; flatulence; with: CARB-V  CHIN
3.      Stomach; nausea; eating; after: CARB-V CHIN
4.      Throat; swallowing; difficult; food; will not go down: CARB-V chin
5.      Rectum; diarrhea; morning: CARB-V chin

(Source: Complete Dynamics)

மேற்கண்ட  குறிகளின் அடிப்படையில் அவருக்கு கார்போ.வெஜ் அல்லது சைனாவை கொடுக்க வேண்டும் என்று முடிவு செய்தேன். ஆனால் சைனாவில்  இருக்கக்கூடிய தளர்ச்சி அவரிடம் இல்லை.  அதனால் அதை நீக்கி விட்டேன். ஆனால் , கார்போ.வெஜ் வயிற்றின் மேல்பகுதியில் வலியை ஏற்படுத்தும் தன்மையையும் , ஜீரண உறுப்புகளையும் சரி செய்யும் ஆற்றலும் டைத்தது. அதனால் கார்போ.வெஜ் 30 வது வீரியத்தில் நான்கு உருண்டைகள் கொடுத்து விட்டு சரியாகி விடும் என்று அனுப்பி வைத்தேன்.

ஆனால் , அந்தத் துயரர் நலமடையவில்லை. அடுத்த நாள் காலை மீண்டும் வந்தார். மருந்து வேலை செய்ததற்கான அடையாளமே இல்லை என்று தெரிவித்தார். அத்தோடு,  ஒரு நாள் முழுவதும் எதுவும் சாப்பிடாததால் சோர்வாகவும் இருந்தார். இப்போது சைனாவை 30 வது வீரியத்தில் நம்பிக்கையோடு கொடுத்தேன். ஆனால், மாலை நான்கு மணி வரை அவரது உடல் நலத்தில் எந்த முன்னேற்றம் தெரியவில்லை. சிறுதளவு தண்ணீரைக்கூட அவரால் விழுங்க இயலவில்லை. இப்போது துயரரை மீண்டும் ஆய்வு செய்ய வேண்டிய கட்டாயம் எனக்கு ஏற்பட்டது.  உங்களால் ஏன் உணவையும் , தண்ணீரையும் விழுங்கமுடியவில்லை ?. தொண்டையில்  என்ன செய்கிறது? சொல்லுங்கள் ! என்றேன்.

அதற்கு அவர், " தொண்டையில் ஏதோ ஒன்று அடைத்துக் கொண்டது போல் இருக்கிறது; எதையும் விழுங்க முடியவில்லை " என்றார். அடடா!  இதை நாம் முதலிலேயே கேட்டிருக்க வேண்டுமல்லவா! இதற்கு மருந்து ஜெல்ஜிமியம் அல்லவா! தவறு செய்து விட்டோமே  என்ற குற்ற உணர்வும்  என்னுள் எழுந்தது.  அதற்கான குறிமொழி இது தான்;

Throat; lump sensation; swallowing; could not be swallowed: gels

அதனால், ஜெல்ஜிமியம் மருந்தை 30 வது வீரியத்தில் மாலை ஐந்து மணிக்குக் கொடுத்தேன். ஆறுமணிக்கு துயரர் நலமடையத் துவங்கினார்; உணவும்,நீரும் எடுத்துக் கொண்டார். அடுத்த நாள் இயல்பான நிலைக்கு திரும்பி  அலுவலகம் சென்று விட்டார்.

முதலில் வகைப்படுத்தப்பட்ட குறிகளின் அடிப்படையில் கார்போ.வெஜ் மற்றும் சைனா மருந்துகள் என்னதான் துயரரின் குறிகளோடு  ஓத்திருந்தாலும் , அவரின்  உணர்வு நிலைக்கு பொறுத்தமான மருந்தாக " ஜெல்ஜிமியமே " இருந்திருக்கிறது.

இதைத்தான்  மாமேதை ஹானிமன் தமது மணிமொழி 19 இல் இவ்வாறு குறிப்பிடுகிறார்;  “ஆரோக்கியமான ஒருவரின்  ஆரோக்கியநிலையில் ஏற்பட்டுள்ள மாறுதல்களே நோய் என்று அழைக்கப்படுகின்றன, அம்மாறுதல்கள்களே நோய்க்குறிகளாக தோற்றமளிக்கின்றன. நோயுற்ற அவரிடம் காணப்படும்  அந்நோய்க்குறிகள்  நீங்கி ஆரோக்கியநிலை திரும்பினால் தான் நோய் குணமடைவது சாத்தியமாகும்.  ஆகவே,  உணர்வுநிலை மற்றும் செயல்நிலை (sensations and functions)  சார்ந்து வாழும் அம்மனிதனின் ஆரோக்கிய நிலைமையை மாற்றும் சக்தி மருந்துகளுக்கு இல்லாவிட்டால் அவைகளால் நோயுற்ற மனிதனிடம் ஏற்பட்டுள்ள நோய்த்தன்மையை நீக்கமுடியாது என்பது இதிலிருந்து தெளிவாகும். உண்மையிலேயே மருந்துகளின் குணப்படுத்தும் ஆற்றல் என்பது , மனிதர்களுடைய ஆரோக்கியமான  நிலையில் மாற்றத்தை ஏற்படுத்தும் ஆற்றலைப் பொறுத்ததே ஆகும்.”


எனக்கு நல்லதொரு அனுபவத்தைக் கொடுத்த துயரராக இவர் இருக்கிறார்.

Friday, 28 July 2017

சோலிடாகா

சோலிடாகா
(SOLID)
SOLIDAGA VIRGA-AUREA




சிறுநீரகங்கள் செயலிழந்து துன்பப்படும் துயரர்களை மீட்டெடுத்து அவர்களை மீண்டும் நல்ல நிலைக்கு கொண்டு வரும் மருந்து சோலிடாகா . இம்மருந்து  குறிப்பாக சிறுநீரகங்கள், ஜீரணவழிப்பாதை, கால்கள் மற்றும் இரத்தத்திலும் நன்றாக வேலை செய்கிறது. 


துயரர்கள்  மிகவும் பலவீனமாக இருப்பார்கள். குளிர்ச்சியும் , வெப்பமும் மாறிமாறி தாக்குவதாக உணருவார்கள். இவர்களுக்கு சுலபமாக சளி பிடிக்கும்.

நாட்பட்ட  சிறுநீரக வேக்காடு ( NEPHRITIS=BRIGHT’S DISEASE) .

இம்மருந்து சிறுநீரகங்களில் நேரிடையாக செயல்பட்டு இறுக்கத்தையும்  மற்றும் வீக்கத்தையும் ஏற்படுத்துவதால், சிறுநீர் கழிப்பதில் சிரமப்படுபவர்களையும் , சிறுநீரகத்தில் ஏற்படும் வலிகளையும் நலப்படுத்துகிறது.   (மரு. கவ்தர் வெய்த்).

சிறுநீரகங்கள்  இரத்தத்தில் இருக்கும் விஷப்பொருள்களை வடிகட்டி வெளியேற்றாததால் , அவ்விஷங்கள் உடலில் தங்கி அதனால் ஆஸ்த்மா ( UREMIC AATHMA) ஏற்படும் என்று மரு. எஸ்.ஆர்.பதக் குறிப்பிடுகிறார். 

ஆஸ்த்மாவும் , சிறுநீர்கழிப்பதில் சிரமமும் (இரவில்) சேர்ந்தே இருக்கும். ( மரு. எஸ்.எம். சர்க்கார்).

மஞ்சள்  சுரத்திற்கும் மற்றும் பூனைகளினால் ஏற்படும் ஒவ்வாமைக்கும் இது மிகச் சிறந்த மருந்து என்கிறார் மரு. வெர்முலன் பிரான்ஸ் . 

சுக்கிலசுரப்பியில் அழற்சி ஏற்படுவதாலும் அல்லது பெருத்துவிடுவதாலும் கண்கள் சிவந்து காணப்படும்.

வாயில் கசப்புச்சுவை இருந்து கொண்டேயிருக்கும். நாக்கில் அடர்த்தியான மாசு படிந்திருக்கும்; சிறுநீர் நன்றாக கழிந்துவிட்டால் இது சரியாகிவிடும்.

சிறுநீர் கருமையாகவும் மற்றும் சிறிதளவே  வெளியேறும் . அல்லது தெளிந்த, முடைநாற்றமுடைய (STINKING) , படிகாரத்தின் இயல்புடன் , பசை போன்று வெளியாகும் (BENZ-AC,NIT-AC).

சிறுநீரகங்கள் கூருணர்ச்சியுடன் , சிறு அழுத்தத்தையும் தாங்காத நிலையில் புண்ணாகி , வலியுடன் வீங்கிக் காணப்படும். அதனால் சிறுநீரகத்தில் இருக்கும் வலி அடிவயிறு , சிறுநீர்ப்பை மற்றும் தொடைப்பகுதி வரை நீடித்திருக்கும்  ( BERB).

பெண்களுக்கு கர்ப்பப்பை பெருத்து விடும்; அதனால் சிறுநீர்ப்பையை கிழே அழுத்தித் தள்ளும். நார்த்திசுக்கட்டிகள். பெண்களுக்கு இடுப்புவலி வந்தால் அது உடல்முழுவதையும் பாதித்து விடும்.

கால்களில் சிவப்பான இரத்தப்புள்ளிகள் . நீர்கோவையுடனும் மற்றும் அரிப்புடனும் காணப்படும். (PETECHIAE).

தோலில் கரப்பான் புண் இருக்கும்; சிறுநீர் உள்ளமுக்கப்பட்டதால் தொல்லைகள் அதிகரிக்கும்.

இவர்களது தொல்லைகள் யாவும் அமுக்குவதால் அல்லது அழுத்துவதால் அதிகரிக்கும் . சிறுநீர் தாராளமாக வெளியேறிவிட்டால் தொல்லைகள் குறைந்து விடும்.

ஆர்சனிக்கம் ஆல்பம்  இதனுடைய உறவு மருந்து ஆகும். 



ரூடா

ரூடா
(RUTA)
RUTA  GRAVEOLENS




எலும்புகளிலும் , எலும்புகளின் மேலுள்ள தோல்களிலும் அடிபட்டதால் ஏற்படும் தொந்தரவுகளுக்கு ரூடா சிறந்த மருந்து. அதேபோல் எலும்பு முறிவுகள் , எலும்பு மூட்டுகள் நழுவுதல் (முக்கியமாக) , வாதநோய் சார்ந்த  மற்றும் இணைப்புத் திசுக்களில் ஏற்படும் தொல்லைகளுக்கும் மிக சிறந்தது. கணுக்கால் மற்றும் மணிக்கட்டுகளில்  சுளுக்கு   வீக்கம் போன்ற உணர்ச்சி போன்ற  குறிகளில் ரூடா, ரஸ்டாக்ஸ்  மருந்தை ஒத்திருக்கிறது.


இவர்கள் பதட்டம், எரிச்சல் மற்றும் வளைந்து கொடுக்காத தன்மையுள்ளவர்களாக இருப்பார்கள். மனம் மந்தமாக இருக்கும் அதனால்  சிந்தித்து செயலாற்றுவதற்கு விரும்பாதவர்கள். சந்தேககுணம். சண்டையிடும் குணம் . நடந்துவிட்ட செயலுக்கு அகச்சான்றின் உறுத்தல் உள்ளவர்களாகவும் இருப்பார்கள் (REMORSEFUL). காய்ச்சலின்  போதும் அல்லது உடலின் வெப்பம் அதிகமாகும் போகும் ஏற்படும்  திகில் உணர்வினால் இறந்து விடுவோம்  என்று பயம் தோன்றும். 


தான் எப்போதும் ஏமாற்றப்படுவதாக கற்பனை செய்து கொள்வார் அதனால் தன் மேலும் மற்றவர்கள் மேலும் அதிருப்தி இருக்கும். ( மரு. வெர்முலன் பிரான்ஸ்)


உடல் முழுவதும் விறைப்பாக இருக்கும் . உடல் உழைப்பின் போது  விரைவில் களைத்து விடுவார்கள். முதுகைக் கீழே வைத்துப் படுக்கும் போது இவர்களது முதுகுவலி குறையும் . அதேசமயத்தில் கீழே படுக்கும் போது உடல் பாகத்தில் புண்போன்ற உணர்ச்சியும் இருக்கும். மனஅமைதியின்றி அல்லது நிலைகொள்ளாமல் படுக்கையில் அடிக்கடி புரண்டு படுப்பார்கள்; இடம் மாறுவார்கள். இது ரூடாவின் முக்கியக் குறிகளில் ஒன்று.

தூக்கத்தில் இருக்கும் பொழுது இலேசாக தொட்டாலும் திடுக்கிட்டு விடுவார்கள்.( மரு. வெர்முலன் பிரான்ஸ்)

தலைசுற்றல்; மாலையிலும் , நீண்ட நேரம் உட்கார்ந்து இருந்தாலும் தொல்லைகள் கூடும். இவர்களுக்கு கழுத்து விரைத்துக் கொள்ளும்.


கண்களை நுண்ணிய வேலைகளில் உபயோகப்படுத்துவதால் ஏற்படும் கண் கோளாறுகள்; உதாரணமாக கடிகாரம் பழுது பார்த்தல், அச்சுக்கோர்த்தல், கூர்ந்து வாசித்தல் , நுட்பமான தையல் வேலை, மரம் மற்றும் கல் போன்றவற்றைச் செதுக்கிச் சிற்பவேலை செய்தல் , நகைகளுக்கு கல் பதித்தல் முதலிய வேலைகளில் ஈடுபடுவோர்களுக்கு பார்வை பலவீனமடைந்து மங்களாதல். அதனால் தலைவலியும் ஏற்படும். கண்கள் சிவந்து எரிச்சலுடன் இருக்கும்.


முதுகுவலி , இடுப்புவலி மற்றும் தொடைநரம்பு வாதவலி ( SCIATICA) போன்ற வலிகள்; கீழே படுத்தால் குறையும்.


கால்களில்  ஏற்படும் வாதவலிகள் குளிர்ச்சியான , ஈரப்பதமான பருவ நிலையிலும் , உடலுழைப்பின் போதும் அல்லது சிரமம் எடுக்கும் போதும் அதிகமாகும். நாற்காலியிலிருந்து எழுந்திருக்கும் போது கால்கள் துவண்டு போகும். அதாவது தொடைகளும் , தசைகளும் அவ்வளவு பலவீனமாக இருக்கும்.

குளிந்த நீரைப் பருக கடுமையான , தனிக்கமுடியாத தாகம் இருக்கும்   (J.T. கெண்ட்)

மலசிக்கல் இருக்கும்; அடிக்கடி பயனில்லாத மலம் கழிக்கத் தூண்டுதல் ஏற்படும்.

மலப்பை நழுவுதல் ( RECTAL PROLAPSE OR PROLAPSE ANI ) என்பது இம்மருந்தின் முக்கிய குறியாகும். குறிப்பாக பிள்ளைபெற்ற பிறகும் , மலம் கழிக்க முயற்சிக்கும் போதும் மலப்பை நழுவினால் அதற்கு ரூடா தான் மருந்து என்பதில் சந்தேகத்திற்கு சிறிதும் இடமே இல்லை. 

மலம் கடினமாக இருந்தாலும்  சரி அல்லது  இளகி இருந்தாலும் சரி மலத்தைக் கழித்தவுடன் ஒவ்வொரு தடவையும் தவறாமல் மலப்பை நழுவும்.

மலக்குடல் பகுதியில் உண்டாகும் புற்று நோயிற்கு ரூடா மிகச் சிறந்த மருந்து என்கிறார் மரு. வில்லியம் போயரிக்.


காயங்களின் விளைவாக எலும்பின் மேல்தோல் தடித்து பல இடங்களில் கடினமாகி முண்டுகள் போல் வீக்கம் ( GANGLION)  இருக்கும். எலும்பின் மேல்தோல்,  மூட்டுகள் , தசைநார்கள் மற்றும் மணிக்கட்டுகள் ஆகிய இடங்களில் கழிவுப் பொருள்கள் தேங்கும்  குணமும் காணப்படும்.

எலும்புகளை மூடியுள்ள சவ்வுகள்  மற்றும் தசைநாண்கள் கிழிந்தும் , கணுக்கால் மற்றும் மணிக்கட்டுகளில் பெரிய அளவில் சுளுக்குவீக்கம் ஏற்பட்டிருக்கும் துயரர்களை ரூடா நலப்படுத்துகிறது. அதே சமயத்தில் நீண்ட நாட்களுக்கு முன்பு ஏற்பட்ட சுளுக்கினால் வலி உருவாகி அவதியுறும் துயரர்களுக்கு ஸ்ட்ராஞ்சியம் கார்பானிகம் (STRONT-C) பயன்படுகிறது என்றும் அடிக்கடி கணுக்காலில் சுளுக்கை ஏற்படுத்திக் கொள்ளும் தன்மையுள்ளவர்களாக  நேட்ரம் கார்பானிகம் (NAT-C) துயரர்களும் இருப்பார்கள் என்று மரு. தீதியர் கிராண்ட்ஜார்ஜ் குறிப்பிடுகிறார்.


ரூடா துயரர்களுக்கு குளிர்ச்சியான பருவகாலம் மற்றும்  குளிர்ச்சியும் ஈரக்கசிவும் உள்ள பருவ நிலைகளிலும் தொல்லைகள் அதிகமாகும். அத்துடன் நுட்பமான கண்வேலை அளவிற்கு மீறிச் செய்யும் போதும், மலம் கழிக்க மூக்கும் போதும் தொல்லைகள் உருவாகும். இவர்களது தொல்லைகள் யாவும் கீழே படுப்பதாலும், அசைவதாலும் குறையும்.


Saturday, 22 July 2017

சைக்லோமென்

சைக்லோமென்
(cycl)
CYCLAMEN




இவர்கள் பலவீனத்தாலும், இரத்தசோகையினாலும் மற்றும் பார்வைக் குறைபாடுகளாலும் பாதிக்கப்பட்டவர்களாக இருப்பார்கள். மாதவிலக்கு  தொல்லைகள்  மற்றும் கொழுப்பு உணவு ஒத்துக் கொள்ளுவதில்லை என்ற குறிகளினால் இவரும்  பல்சட்டில்லா  துயரரும்  போலவே ஒன்று போலவே இருப்பார்கள்.  


அடி மனதில் ஆழ்ந்த வருத்தத்தை உள்ளே அமுக்கி கொண்டிருப்பார். தமது கடமையில் தவறிவிட்டோம் என்ற குற்ற உணர்வு இருக்கும். இவரும்  பல்சட்டில்லா போல் இரக்கச்சுபாவம் உள்ளவராகவும் அமைதியானவராகவும் , அழுகும் தன்மை படைத்தவராகவும் இருப்பார்.


சைக்லோமென் துயரர்கள்  முழுநிறைவான அல்லது குறையற்ற , மிக உன்னிப்பான அல்லது கடமை உணர்வுடைய வாழ்க்கையைப் பெற்றுயிருப்பார்கள். ஆனால் , துரதிருஷ்டவசமாக தமது கடமையைச் செய்யும் பொழுது மிக நுண்ணியஉணர்வினால் தூண்டப்பட்டு சிறிய தவறுகள் செய்ய நேரிடும்.இத்தகைய தவறுகளே இவர்களது வாழ்க்கையை பாழ்படுத்தும். இவர்களது குடும்பம் முழுவதும் இவர்களது பொறுப்பில் இருப்பதாகவும் , அவர்களை பாதுகாக்கும் கடமை தனக்கு இருப்பதாகவும் நினைப்பார்கள். அவர்களுக்காவே தமது வாழ்க்கையை அர்ப்பணித்து இருப்பார்கள். அவருடைய குடும்பத்தில் ஏதாவது தவறு நேர்ந்து விட்டால் (தெரிந்தோ அல்லது தெரியாமலோ) அச்செயலுக்குத் தானே பொறுப்பு என்ற குற்றவுணர்வு மேலோங்கும்.

இவர்கள் அடர்த்தியான இருண்ட கலரில் நன்றாக ஓவியம் வரைவார்கள், அது அவர்களுடைய ஆழ்மனதில் மறைந்திருக்கும் குற்றஉணர்வின் வெளிப்பாடாக இருக்கும் என்று குறிப்பிடுகிறார் மரு. பரூக் மாஸ்டர்.


ஆனால் சைக்லோமென் துயரரின்  தொல்லைகள் திறந்த வெளியில் அதிகரிக்கும் மற்றும் இவருக்கு தாகமும் இருக்கும் (மரு. ரோஜர் மாரிசன் ). இந்த இரு விஷயத்தில் பல்சட்டில்லா துயரரிடமிருந்து மாறுபடுவார். ஆனால் இவர்களுக்கு தாகம் இருக்காது என்று மரு.வெர்முலான் பிரான்ஸ் அவர்களும், பகலில் தாகமின்மையும் மாலையில் தாகமும் இருக்கும் என்று மரு.கவ்தர்வைத் அவர்களும் குறிப்பிடுகிறார்கள்.


வெண்ணெய், கொழுப்பு , ஆட்டுக்கறி, பன்றிக்கறி இவைகளை சாப்பிட வெறுப்பு. எலுமிச்சம் பழச்சாறு பானம் குடிக்க விருப்பமிருக்கும். உணவில் அதிக உப்புச்சுவை இருப்பதாகத் தோன்றும்; உமிழ்நீரும் உப்புச்சுவையில் இருக்கும்.


ஒருபக்க தலைவலி. தலைவலியின் போது குளிர்ந்த தண்ணீரில் நெற்றியைக் கழுவினால் சுகம்.

கண் முன்னாடி கருப்பாக பறக்கற மாதிரி, மின்னுவது போல, நட்சத்திரம் மாதிரி, ஈ பறக்கற மாதிரி தெரியும். பார்வை மங்கலாக இருக்கும். இரட்டைப்பார்வை . மாறுகண்.


பெண்களுக்கு பிரசவ வேதனை போன்ற கடுமையான வலியுடன் கூடிய மாதவிலக்கு ஏற்படும். மாதவிடாய் இலகுவாக தடைபடவும் செய்யும். மாதவிடாய் ஏற்படாமலும் போய்விடலாம். சில பெண்களுக்கு மாதவிடாய் சில  நாட்களுக்கு முந்தியும்  , மிகவும் ஏராளமாகவும் போக்கு இருக்கும். மாதவிடாய்  கருப்பாகவும் ,  கட்டியாகவும் வெளிப்படும். மாதவிடாய் ஏற்பட்ட பிறகு நலமாக இருப்பதாக உணருவார்கள். (LACH, ZINC).


கர்ப்பமில்லாத பெண்களுக்கு மாதவிடாயிற்குப் பிறகு மார்பில் பால் சுரக்கும் அல்லது மார்பகங்களில் வீக்கம் ஏற்படும்.


ஆண்களுக்கு சுக்கிலசுரப்பி அழற்சி ஏற்பட்டிருக்கும். மலம் மற்றும் சிறுநீர் கழிக்கும் போதும் , உடகாரும் போதோ  அல்லது நடக்கும் போதோ தொல்லை கள்  அதிகரிக்கும்.



முன் கையிலிருந்து விரல்கள் வரை இழுத்துக் கொள்ளும் ( WRITER’S CRAMP) எழுத முடியாது. அதே போல் குதிங்காலில் புண்ணும் , வலியும் இருக்கும்; உட்கார்ந்தாலோ அல்லது நின்றாலோ மோசமாகும்.

Monday, 17 July 2017

நேட்ரம் ஆர்சனிக்கம்

நேட்ரம் ஆர்சனிக்கம்
(NAR-AR)
NATRUM ARSENICUM


ஆர்சனிக்கம் ஆல்பம் போன்று பதட்டத்தோடும் , நேட்ரம் குடும்பத்திற்குரிய கவலை மற்றும் வாயில் புண்களோடு வரும் துயரர்களுக்கு இம்மருந்து பயன்படும். அதேபோல் நிலக்கரி சுரங்களில் வேலை செய்யும் தொழிலாளர்களுக்கு அத்தூசியினால் உருவாகும் ஈழை நோயிற்கும் இது சிறந்த மருந்து (MINER’S ASTHMA).

மார்பிலும் , இருதயத்திலும் தாங்க முடியாத துன்பநிலை இருக்கும். இருதயத்தில் நாடித்துடிப்பு ஒழுங்காக இருக்காது; எண்ணிக்கையில் மாறுபடும்; வழக்கத்தை விட மெதுவாகத் துடிக்கும் ( DIGIT, CANN-I, OP). நுரையீரல் பகுதியில் புகையை நுகர்ந்து அடைந்திருப்பது போன்ற உணர்வு இருக்கும். புகை இவர்களுக்கு ஒவ்வாது. நுரையீரல் காச நோயிற்கு இது முக்கியமான மருந்து. 

உடல் முழுவதும் களைப்பு இருக்கும். தைராய்டு சுரப்பியை கட்டை விரலை வைத்தோ அல்லது விரல்களை வைத்தோ நெருக்கி அமுக்குவது போன்ற உணர்வு இருக்கும். உடல் நலத்தைப் பற்றிய பதட்டமிருக்கும். உடல் எடை குறைந்திருக்கும்.

கவலை. உணர்ச்சிகள் உள்ளமுக்கப்பட்டிருக்கும். பேராவல் உடையவராகவும் (AMBITIOUS) , மிகப் பெரிய சாதனை புரிபவர்களாகவும் , நேர்த்தியான குணம் படைத்தவர்களாகவும் (PERFECTIONISM) இருப்பார்கள். சுலபத்தில் திருப்தியடையாதவர்களாகவும்   , குற்றம் காணுபவர்களாகவும் இருப்பார்கள்.சிறிய விஷயத்திற்கும் கோபம் ஏற்படும். கருத்து வேறுபாடு அல்லது முரண்பாட்டினாலும் கடுங்கோபம் ஏற்படும்.

கோபத்திற்குப் பிறகு தொல்லைகள் அதிகரிக்கும். வியாபாரம் மற்றும் மனவேலை செய்ய வெறுப்பு ; அதேபோல் படிப்பதற்கும் வெறுப்பு. மனதை ஒருநிலைப் படுத்த முடியாது. ஞாபக மறதி (ANAC, APIS).

சந்தேககுணம். சலித்து அலுத்துக் கொள்கிற (LISTLESS) அல்லது அக்கறையற்ற குணம் (GELS, NUX-V, PH-AC).

குளிர்ச்சியான உடைவாகு. உடலைச் சுற்றி போர்த்திக் கொண்டிருப்பார்கள் அல்லது தீ அல்லது சூட்டின் அருகில் உட்க்கார்ந்திருப்பார்கள்.

தலை முழுவதும் சூட்டுடனும் , நிரம்பியது போன்றும் இருக்கும். ஒவ்வொரு அசைவிலும் தலையில் ஒலி அதிர்வை ஏற்படுத்தும்.

படிக்கும் போதும், எழுதும் போதும் கண்களில் சோர்வும் மற்றும் வலியும் ஏற்படும் (MYRICA, NAT-M, PHOS, RUTA, SEP).

மணம் அறியும்ஆற்றல் குறைந்திருக்கும் அல்லது இல்லாதிருக்கும். மூக்கு அடைத்துக் கொள்ளும் ; இரவிலும் , காலையிலும் தொல்லை அதிகரிக்கும் (NUX-V).
                               


இரவில் வாயின் மூலமாக சுவாசிக்க வேண்டியதிருக்கும் ; அதனால் வாய் திறந்திருக்கும் (AM-C).

இவர்களுக்கு உடல் உழைப்பினால் தொல்லைகள் ஏற்படும். அசைவினாலும் தொல்லைகள் அதிகரிக்கும். அதனால் படுத்துக் கொண்டிருப்பதையே விரும்புவார்கள்; யாரும் தொந்தரவு செய்வது பிடிக்காது. படுத்துக் கொண்டிருந்தாலும் தொல்லைகள் அதிகரிக்கவே செய்யும்.  அசைவதையே வெறுப்பார்கள்.

தொல்லைகள் வலது பக்கமே ஏற்படும்.

கடுமையான  இருமல் ; இருமிக் கொண்டேயிருப்பார்கள்; மூக்கிலிருந்து மஞ்சள் நிறத்தில் சளி ஒழுகிக் கொண்டேயிருக்கும் (KALI-BI, HYDRAS). மூக்கில் சளி காய்ந்து கட்டிதட்டியிருக்கும் ; அதை நீக்கினால் இரத்தம் வெளியாகும்.

தொண்டையடைப்பான் (DIPTHERIA) . தாகம் அதிகமிருக்கும்;  குறைந்த அளவு தண்ணீரை அடிக்கடி குடிப்பார்கள் (ARS, HYOS) . தண்ணீர் குடித்தவுடன் தொல்லைகளும் அதிகமாகும்.  

பால் ஒத்துக்  கொள்ளாது.

மலச்சிக்கலும் , வயிற்றுப்போக்கும் மாறி மாறித் தோன்றும் ( ANT-C,CIMIC,NUX-V, PODO).

காலையில் எழுந்தவுடன் மலங்கழிக்க ஓடுவார்கள்; மலம் மஞ்சள் நிறத்தில் , தண்ணீராக , ஏராளமாக  வலியில்லாமல் போகும்.

சில சமயம் மலங்கழிப்பதற்கு முன்பு வலி ஏற்படும்; மலங்கழித்த பிறகு அந்த வலி நீங்கி விடும் (COLOC).

யானைச்சொறி- சருமத்தில் செதில் செதிலாக உரியும் நீடித்த வகை சருமத் தடிப்பு நோய் (PSORIASIS).


இவர்களது தொல்லைகள் யாவும் காலையிலும் , சாப்பிட்டபிறகும் அதிகமாகும். திறந்த வெளிக்காற்றில் நடக்கும்  பொழுது தொல்லைகள் குறையும்.


ஆம்பிரா க்ரிஸா

ஆம்பிரா க்ரிஸா
(ambr)
AMBRA GRISEA



ஒட்டி  உலர்ந்த உடலும், பரபரப்பும் உள்ளவர்களுக்கும், மெலிந்து தோலும் எலும்புமாய் உள்ள பெண்களுக்கும் தளர்ச்சியடைந்த உறக்கமற்ற , நடுக்கமுள்ள ( NERVOUS) வயதானவர்களுக்கும் , குழந்தைகளுக்கும் உபயோகப்படக் கூடியது.

மனமும் , உணர்வும் சீர்குலைந்த நிலையிலிருக்கும் துயரர்களுக்கும் இது முக்கியமாகப் பயன்படுகிறது. துயரர்  முதலில் யாருடனும் பேச விரும்பாதவராகவும் , கூச்சத்தன்மையுடனும் இருப்பார்; இந்நிலை முற்றிய பிறகு அறிவுகுறைபாடுடன் சற்று அதிகம் பேசுபவராகவும் இருப்பார்.

பேசும் பொழுது ஒரு பொருளிலிருந்து மறறொரு பொருளுக்குத் தாவிக் கொண்டே இருப்பார்கள்; இவரது முதல் கேள்விக்கு நாம் பதில் சொல்வதற்குள் பேசிக் கொண்டே போவார்கள்.

மனநிலை பாதிக்கப்பட்டு மந்தநிலை ஏற்படுவதால் விஷயங்களை சீக்கிரத்தில் புரிந்து கொள்ள முடியாமை; ஒரு வாக்கியத்தை பலமுறை திரும்பத் திரும்பப் படிக்க வேண்டியிருத்தல்; அப்படிப் படித்தாலும் புரியாது; சிந்தனை செய்யும் சக்தி குறைவாக இருக்கும்.

தனக்கு வறுமைநிலை ஏற்பட்டுவிடும் என்று பயந்து இவர், யாருக்கும் எதுவும் கொடுக்கமாட்டார் (மரு.தீதியர்).

வியாபாரம் தோல்வியடைந்த பிறகும் (கவலை); குடும்பத்தில் அடுத்தடுத்து ஒவ்வொருவராக பலர் இறந்தாலும் ஏற்படும் அதிர்ச்சி (மரு.பதக்) .

மனத்துன்பத்துடன் பல நாட்களாக அலுத்து கொண்டிருப்பார்கள் ; சிரிப்பதற்கு விருப்பம் இருக்காது.

இவர்களுக்கு நேரம் மெதுவாக செல்லுவதாகத் தோன்றும்.

வயதானவர்களுக்கு தொன்று தலைச் சுற்றல்.

இசிவு. மனஅழுத்தம். பதட்டம். (மரு.ரோஜர் மாரிசன் )

நாக்கின் அடியில் நீர்க்கட்டியோ அல்லது தசை வளர்ச்சியோ இருக்கும்.

மிகவும் வெட்கப்படும் சுபாவம். இவர்கள்  யாருடனும் சேர்ந்திருக்க விரும்பமாட்டார்கள் ( குறிப்பாக அந்நியர்கள்).  வீட்டிலோ அல்லது பொது இடங்களிலோ யாராவது உடனிருந்தால்  அதாவது , செவிலியரோ அல்லது அறையில் வேறு யாரோ கூட இருந்தால் இவர்களால் சிறுநீரோ அல்லது மலங்கழிக்கவோ முடியாது.

அதேபோல் குழந்தைகளும் மற்றவர்கள் முன்பு மலம் மற்றும் சிறுநீர் கழிக்க விரும்பாது; குழந்தையை மலங்களிக்க கழிவறைக் கோப்பையில் உட்க்காரவைத்தால்  எழுந்து சென்று வீட்டின் மூலையில் ஒளிந்து கொள்ளும்.


மலச்சிக்கல் ; அடிக்கடி மலங்களிக்க தோன்றும்.(NUX-V)

சப்தம் மற்றும் இசைக்கு மிகவும் கூருணர்ச்சி உள்ளவர்களாக இருப்பார்கள் (அழுகை வரும்). இசையினால் தொல்லைகளும் அதிகரிக்கும்.

இசையைக் கேட்டவுடன் இருமல் தூண்டப்படும் ; அடிக்கடி பேசினாலும் அல்லது சத்தமாக படித்தாலும் இருமல் கூடும். அடிக்கடி ஏப்பத்துடன்  வலிப்பு போன்ற கடுமையான இருமல் இருக்கும் ; பல மனிதர்கள் உள்ள இடத்திலும் , புதிய மனிதர்கள் இருக்கும் இடத்திலும் இருமல் அதிகமாகும்.

குழந்தைகளுக்கும் , வயதானவர்களுக்கும் ஏற்படும் காச நோய்.  மார்பில் அமுக்கும் உணர்ச்சியும் , காற்றுக் குழாயில் கரகரத்த சப்தமும் , இதயத்தின் ஆழத்திலிருந்து வலி வருவது போன்று இருக்கும். குறிப்பாக வயதானவர்களுக்கு உடலுறவிற்கு முயற்சி செய்யும் போது தோண்டும் காச நோய்.


கவலையினால் தூக்கம் வருவதில்லை, எழுந்து உட்கார நேருதல்.


பெண்களுக்கு மாதவிடாய்களின் இடைக்காலங்களிலும் , கஷ்டப்பட்டு மலங்களித்த பிறகும் அல்லது கடினமாக நடந்த பிறகும் இரத்தஒழுக்கு இருக்கும்.(மரு.இ.பி.நாஷ் ).


வெப்ப உடல்வாகு உள்ளவர்கள்.குளிச்சியான உணவையும் , குளிர்ந்த பானங்களையும் விரும்புவார்கள்.


இதனுடைய உறவு மருந்தாக பாரிடா கார்பானிக்கம் மற்றும் இக்னேசியாவும் இருக்கிறது.

Thursday, 15 June 2017

ஹோமியோபதி மருத்துவத்தில் துயரர் ஆய்வும் ஒத்த மருந்துத் தேர்வும்- பாகம்-1

ஹோமியோபதி  மருத்துவத்தில் துயரர் ஆய்வும் ஒத்த மருந்துத் தேர்வும்- பாகம்-1

(Case taking & Selection of Similimum)

ஹோமியோபதி மருத்துவத்தில் சிகிச்சை பெற வரும் ஒரு துயரருக்கு , அவரது உடலின் உயிராற்றலில்  ஏற்பட்டுள்ள மாற்றத்தினால் தோன்றியுள்ள பண்பியல்பு குறிகள் ( Characteristic symptoms) , அப்பொழுது இருக்கும் மனக்குறிகள் ( Mind Symptoms),   மாறுமைகள் (Modalities) மற்றும் உடனுறையும்குறிகள் (Concomittant)  போன்ற குறிகளோடுமருத்துவர் தமது புலன்களால் உணர்ந்த குறிகள் மற்றும் உறவினர்கள், நண்பர்கள் ஆகியோர்கள் துயரரைப் பற்றித் தெரிவித்த  கருத்துகளையும் உள்ளடக்கிய ஒட்டுமொத்தக் குறிகளின்  அடிப்படையில் (Totality of symptoms) , ஹோமியோபதி ஒத்தவை விதிப்படி ( Law of similar) சரியான மருந்தினை தேர்வு செய்து கொடுப்பது ஒரு மருத்துவரின் கடமையாகிறது. அது மட்டுமல்லாமல் அந்த ஹோமியோபதி மருத்துவரின் வெற்றி என்பது, குறிப்பிட்ட அந்தத்  துயரரைத் தனித்துவப்படுத்தி அந்தத் துயரருக்கே உரிய ஒத்த மருந்தினைத் தேர்ந்தெடுத்துக் கொடுத்து அவரை நலப்படுத்துவதில் தான் அடங்கியுள்ளது. அவ்வாறு ஒத்த மருந்தினை தேர்வு செய்வதற்கு கீழ்க்காணும் வழிமுறைகளை ஒவ்வொரு மருத்துவரும் கடைப்பிடிக்க வேண்டியது அவசியம். அவையாவன;
I.     துயரருடன் கலந்துரையாடல் ( Case Taking).
II.   துயரரிடம் பெற்ற குறிகளை சரிபார்த்து அதனுள்ளே மறைந்துள்ள கருத்தினை புரிந்து கொள்ளுதல்.அவற்றை மருந்தியல் களஞ்சியம் மற்றும் அரும்பொருட்களஞ்சியத்தோடு  ஒப்பிடுதல் (Eliciting, Verification,Interpretation of symptoms & Translating into Language of Materia Medica and Rubric in Repertory)
III.  குறிகளை பகுப்பாய்வு செய்து மதிப்பிடுதல் ( Analysis and Evaluation of Symptoms).
IV.  பொருத்தமான குறிகளின் அடிப்படையில் ஒத்த மருந்துனை தேர்வு செய்தல் (Repertorization).

மேற்கண்ட வழிகாட்டுதலின்படி ஒவ்வொரு ஹோமியோபதி மருத்துவரும் செயலாற்றி துயரருக்கு  மருந்து தேர்வு செய்து கொடுக்கும் பொழுது அம்மருந்து துயரருக்கே உரிய ஒத்தமருந்தாக  அமைகிறது (Similimum).  துயரரும் நலம் குன்றிய நிலையிலிருந்து மாறி முழு நலத்திற்கு திரும்புகிறார். இப்போது , மேற்கண்ட நான்கு பகுதிகளைப் பற்றியும் சற்று விரிவாகப் பார்ப்போம்.

I. துயரருடன் கலந்துரையாடல் ( Case Taking):

ஹோமியோபதி மருந்துத் தேர்விற்கு துயரர் ஆய்வு அல்லது கலந்துரையாடல் முக்கியப் பங்கு வகிக்கிறது. அதன்  முக்கிய நோக்கமானது அவருடைய தொல்லைகளை தெளிவாகப் புரிந்து கொண்டு , நோயைப்பற்றிய எந்த விதமான முன் அபிப்பிராயமும் இல்லாமல்  திறந்த மனதோடு ( Blank mindness) அவரிடம் உள்ள அனைத்துக் குறிகளையும் ஒன்றுவிடாமல் பதிவு செய்து கொண்டு  பின்னர் அக்குறிகளுக்கு தகுந்த ஒத்த மருந்தினைக் கொடுத்து அவரை நலப்படுத்துவது தான். துயரர் ஆய்வின் போது மருத்துவர்   தவறு இழைக்க நேரிட்டால் அது மருந்துத் தேர்விலும் பிரதிபலித்து தவறான மருந்தினை தேர்வு செய்திட நேரிடும். அதனால் தான் ஹோமியோபதி மருந்துத் தேர்வில் துயரர் ஆய்வு என்பது முக்கியப் பங்காற்றுகிறது.

துயரரை புரிந்து கொள்வது எப்படி என்பது பற்றி மாமேதை.ஹானிமன் அவர்கள் தமது ஆர்கனான் ஆப் மெடிசின்என்ற நூலில்  மணிமொழி 83 இலிருந்து 104 வரை ஏறத்தாழ 22 மணிமொழிகளில் தெளிவாகவும் , விரிவாகவும் விளக்கியிருப்பார். குறிப்பாக மணிமொழி 84 இல் , நோயினால் தான்படும் துன்பங்களின் வரலாற்றை துயரர் விவரிக்கிறார். அவர்  அருகே இருப்பவர்கள் , துயரர் தனது துன்பங்களைப்பற்றிக் கூறியது, அவர் நடந்து கொண்ட விதம், அவரிடம் கண்ட விசயங்கள் போன்றவற்றை தெரிவிக்கின்றனர் மருத்துவர் துயரரை உன்னிப்பாக கவனிக்கிறார்;எல்லோரும் உரைத்த விபரங்களை கேட்கிறார்; துயரரிடம் என்னென்ன மாறுதல்களும் , வழக்கத்துக்கு மாறான விசயங்களும் காணப்படுகின்றன என்பதைத் தன் புலன்களால் மதிப்பிடுகிறார் . துயரரும் , அவருடைய நண்பர்களும் அவரிடம் கூறிய எல்லா விசயங்களையும் அவர்கள் கூறிய வண்ணமே ஓர் எழுத்தைக்கூட மாற்றாமல் சரியாக எழுதிக்  கொள்ளவேண்டும். மருத்துவர் தான் மௌனமாய் இருந்து கொண்டு அவர்கள் சொல்லக்கூடிய எல்லா விசயங்களையும் சொல்ல அனுமதிக்கிறார். சம்பந்தமில்லாத விசயங்களுக்குத் தாவினாலொழிய அவர்கள் பேச்சில் குறுக்கிடமாடார். அவர்கள் சொல்லும் விபரங்களில்  முக்கியப்பகுதிகளை குறித்துக் கொள்ள வசதியாய் இருக்கும் வண்ணம் பரிசோதனையின் துவக்கத்திலேயே மெதுவாய்ப் பேசும்படி அவர்களிடம் தெரிவிக்க வேண்டும். இடைமறித்துக் குறுக்குக் கேள்விகள் கேட்டால் அவர்கள் சொல்ல வந்த விசயங்களை மறந்துவிடுவார்கள். அவ்வாறு மறந்து போன விசயங்களைப் பிறகு எவ்வளவு முயற்சித்தாலும் ஞாபகத்திற்கு கொண்டு வர முடியாமல் போகலாம்என்று நமக்கு வழிகாட்டுகிறார்.

அடுத்து, மணிமொழி 86 இல் , “துயரர்களும் அவருடைய நண்பர்களும் கூறி முடித்தபின் மருத்துவர் அவர்கள் கூறியவற்றிலிருந்து வெளிப்பட்ட முக்கியமான குறிகள் ஒவ்வொன்றையும் எடுத்துக்கொண்டு அவைகளைப் பற்றிய திட்டமான விபரங்களைத் தெரிந்து கொள்ள பின்வரும் முறையை கையாளுகிறார். உதாரணமாகஎந்தச் சமயத்தில் இந்தக்குறி தோன்றியதுஇது வரை அவர் உட்கொண்டு வந்துள்ள மருந்தைச் சாப்பிட ஆரம்பிப்பதற்கு முன்னதாகவே தோன்றியதா? அல்லது மருந்தைச் சாப்பிட்டுக் கொண்டிருக்கும் போது தான்  தோன்றியதா? அல்லது மருந்தைச் சாப்பிடுவதை நிறுத்திய சில நாட்களுக்குப் பிறகு தான் ஏற்ப்பட்டதா? இந்த இடத்தில் ஏற்பட்ட வலியின் தன்மை என்ன? எவ்விதமான உணர்ச்சி? வலி அல்லது வலி உணர்ச்சி திட்டமாய் எந்த இடத்தில் இருந்தது? வலி விட்டு விட்டும், தானாகவும், பல்வேறு சமயங்களிலும் தோன்றியதா? அல்லது இடைவிடாமல் தொடர்ச்சியாக நீடித்திருந்ததா? எவ்வளவு காலம் அது நீடித்திருந்தது? இரவிலோ,பகலிலோ,எந்த நேரத்தில், உடலை எவ்விதம் வைத்துக் கொண்டிருந்தால் வலி மிகக் கடுமையாக இருந்தது அல்லது முற்றிலும் மறைந்திருந்ததுஇவ்வாறு ஒவ்வொரு குறிகளையும் அதன் திட்டமான தன்மையைக் குறித்தும் மருத்துவர் தெள்ளத் தெளிவாகத் தெரிந்து கொள்ள வேண்டும். அதே சமயத்தில் , உண்டு அல்லது இல்லை என்று ஒரே வார்த்தையில் விடை தரக்கூடிய நேரிடையான கேள்விகளை எந்தச் சமயத்திலும் உபயோகிக்கக்கூடாது என்று மணிமொழி 87 இல் எச்சரிக்கை செய்கிறார். ஆனால் நோய் பற்றிய விவரங்கள் மேலும் தேவைப்பட்டால் குறிப்பாக , மலம், சளி, வாந்தி, ஏப்பம், நெஞ்சரிப்பு, சிறுநீர், குளிர்சுரம், காய்ச்சல்   மற்றும் வியர்வை போன்றவற்றின் தன்மைகளை பற்றித் தெரிந்து கொள்ள எவ்வாறெல்லாம் கேள்விகள் கேட்கலாம் என்று மணிமொழி 89 லும் , அதன் அடிக்குறிப்பிலும்  ஏராளமான கருத்துக்களை குறிப்பிடுகிறார் ஹானிமன் .


மருத்துவர். பிரபுல் விஜயகர் துயரருடனான உரையாடல் பற்றி குறிப்பிடும் போது,  ஒரு மரத்தை வெட்டுவதற்கு எனக்கு 24 மணிநேரம் கொடுத்தால் அதில் 23 மணிநேரத்தை எனது கோடாலியை கூர்தீட்டுவதற்க்காக செலவிடுவேன் என்று மிக அழகாகக் குறிப்பிடுகிறார். அதனால் துயரருடன் உரையாடும் போது ஒவ்வொரு மருத்துவரும் , துயரர்  தெரிவிக்கும் தொல்லைகள் சம்பந்தமான விசயங்களை தெளிவாக கேட்டும், அதன் உண்மைத்தன்மையை  உடன் வந்த உறவினர்கள் மற்றும் நண்பர்கள் மூலம்  கேட்டும் , தானே பரிசோதித்தும் , தேவைப்படும் தருணங்களில் தலையிட்டு தகுந்த கேள்விகள் கேட்டும் உறுதிபடுத்திக் கொள்ள வேண்டும். அதாவது ஒவ்வொரு துயரையும் தனித்துவப்படுத்தி நலப்படுத்துவதற்கு,  துயரர் பற்றிய முழு விபரங்கள் ( பெயர், வயது, ஆண்/பெண் , தொழில், விலாசம், திருமணம்தொடர்பு கொள்ளவேண்டிய தொலைபேசி எண்கள், நாள், பதிவுஎண்),   அவரின் முக்கியமான தொல்லைகள் ( Chief complaints) , தற்போது உள்ள நோய்க்குறிகள் ( Present symptoms) , துயரரின் கடந்தகால நோய்தாக்குதல் (History of Previous Illness) , தனிப்பட்ட வரலாறு (Personal history) குடும்பவரலாறு (Family history) , புறப் பரிசோதனையின் போது கண்டுபிடித்த வித்தியாசமான குறிப்புகள் (Abnormal findings on physical verification) , மனக்குறிகள் ( Mental symptoms); அதாவது பயம் (Fear) , மனப்பிரமை (Delusions) , கவலை அல்லது துக்கம் (Grief) , நெருக்கடியான சூழ்நிலையில் தோன்றும் உணர்ச்சி நிலை (Emotioal state in stressful situation) , நோய் தோன்றியதற்கான காரணங்கள் (Causation), கனவுகள் (Dreams), குழந்தைப்பருவம் (Childhood), விருப்பு மற்றும் வெறுப்பு (Desires and Aversions) , தாகம் (Thirst) , தூக்கம் (Sleep) , மாறுமைகள் (Modalities) , பொழுதுபோக்கு மற்றும் பிறவிருப்பங்கள் (Hobbies and interests) , கடந்தகாலங்களில் எடுத்துக்கொண்ட மருத்துவ சிகிச்சைகள் மற்றும் அதன் முடிவுகள் (Previous treatment and results) போன்றவைகளுக்கு முக்கியத்துவம் கொடுத்து அனைத்து விபரங்களையும் மிகத் தெளிவாக பதிவு செய்ய வேண்டும். இப்போது துயரர் ஆய்வு எப்படி நடைபெற வேண்டும் என்பதை சற்று விரிவாகப் பார்க்கலாம்.

1.    துயரர் பற்றிய முழு விபரங்கள் (Details of the Patient): துயரருடைய பெயர்,வயது,விலாசம், தொழில்,திருமணம், மற்றும் அவர் சார்ந்துள்ள மதம் ,  அது சம்பந்தமாக அவர் கடைபிடிக்கும் பழக்கவழக்கங்கள் போன்ற விபரங்களை கேட்கும் பொழுது அவர் எவ்வாறு பேசுகிறார்? , தெளிவான  மனநிலையில் இருக்கிறாரா அல்லது குழப்பத்தில் உள்ளாரா ? என்பனவற்றை நாம் தெரிந்து கொள்ள இயலும். அதேபோல் துயரரின் விலாசம்  மற்றும்  அவசரத்திற்கு  தொடர்பு கொள்ளவேண்டிய தொலைபேசி எண்கள் முதலியவற்றையும் தவறாமல் பதிவு செய்து கொள்ளவேண்டும். இவ்விபரங்கள் சிகிச்சையின் போது ஒருவேளை துயரர் மயக்கமடையநேரிட்டால் அவரது உறவினர்களுக்குத் தகவல் தெரிவிக்க உதவும்.
2.    முக்கியமான தொல்லைகள்  அல்லது நோய்க்குறிகள் ( Chief complaints) :துயரர் எந்தத் தொல்லைக்கு சிகிச்சை எடுத்துக்கொள்ள வந்துள்ளார் என்பதையும்  அந்நிலையில் அவரிடம் காணப்படும்  ஒவ்வொரு குறிகளையும்  தேவையான இடைவெளி விட்டு குறித்துக் கொள்ளவேண்டும். அதன் பிறகு அவரிடம் உள்ள நோய்க்குறிகளைப் பற்றிய விபரங்களை அதாவது அவருடைய தொல்லைகள் எத்தனை நாட்களாக இருக்கிறது?, திடீரென்று உருவானதா அல்லது படிப்படியாக முன்னேற்றம் ஏற்பட்டு இந்தநிலை உருவானதா?,  முதலில் தோன்றிய குறிகள் எவை ?,  இந்த நோய்க்குறிகள் உருவாவதற்கு தூண்டும் சக்தியாக ஏதாவது இருந்ததா? போன்ற விபரங்களை  தெரிந்து கொள்ள வேண்டும். ஏனென்றால் பெல்லடோனா  ,அகோனைட் போன்ற மருந்துகளில் தொல்லைகள் திடீரென்று தோன்றி கடிமையான பாதிப்பினைக் ஏற்படுத்தும் . அதேசமயத்தில்  ஆர்சனிகம் ஆல்பம் , ஜெல்சிமியம் போன்ற மருந்துகள் தேவைப்படும் துயரர்களுக்கு தொல்லைகள் மெதுவாக ஆரம்பித்து படிப்படியாக அதிகரிக்கும்.

அடுத்து , துயரரின் எந்தப்பகுதி (Location) அல்லது எந்த உடலுறுப்பு பாதிக்கப்பட்டுள்ளது என்பதை கவனத்தில் எடுத்துக் கொள்ளவேண்டும். உதாரணமாக துயரருக்கு கைகளில் வலி என்றால் , முழுக்கைகளிலும் அந்த வலி இருக்கிறதா ? அல்லது மணிகட்டுபபகுதியில் மட்டும் .உள்ளதா? அல்லது விரல் நுனியில் இருக்கிறதா? என்பதையும் , அவ்வலி இருந்த இடத்திலிருந்து பரவுகிறது என்றால் எந்தப்பகுதி வரை நீட்டிக்கிறது என்பதையும் குறித்துக் கொள்ளவேண்டும். மற்றும் பாதிக்கப்பட்ட அந்தப் பகுதியில் துயரருக்கு எந்த மாதிரியான உணர்வு உள்ளது (Sensation) , அவரது  தொல்லை எப்பொழுது அதிகரிக்கிறது (Aggravation) அல்லது எந்தச் சூழ்நிலையில் குறைகிறது ( Amelioration) என்பதையும் சரியாக பதிவு செய்து கொள்ளவேண்டும். இந்த மாறுமைகள் (Modalities) சில சமயங்களில் சரியான மருந்தினை தேர்வு செய்வதற்கு பெரிதும் உதவுகிறது (இதுபற்றி தனியாக மாறுமைகள் பகுதியில் பார்க்கலாம்). அதே போல்  துயரரின் நோய்க்குறிகளோடு கூடவே இருக்கும் அல்லது தோன்றும் வித்தியாசமான குறிகளுக்கும் (Concomitants) நாம் முக்கியத்துவம்  கொடுக்கவேண்டும்.
      
3.    நோய் தோன்றியதற்கான காரணங்கள் (Causation) : துயரருக்கு தற்போதைய நோய்த் தாக்குதலுக்கு முன்பு ஏதாவது அதிர்ச்சி, துக்கம், குடும்ப உறுப்பினர்கள் அல்லது நேசித்தவர்களின் இறப்பு  மற்றும் பொருளாதார இழப்பு போன்ற மனதைப் பாதிக்கும் காரணங்கள் இருக்கிறதா என்பதையும்,  வேறு ஏதாவது டைப்பாய்டு, நிமோனியாமற்றும் பால்வினை நோய்கள் போன்ற நோய்களுக்கு முறையான சிகிச்சை எடுத்துக்கொள்ளாமல் உள்ளமுக்கப்பட்ட காரணத்தால் தற்போதைய நோய்தாக்குதல் ஏற்பட்டுள்ளதா என்பதை கேட்டறிந்து கொள்ளவேண்டும்.  அதேபோல்  பெரியவிருந்து , மது, புகையிலை, ஐஸ்கிரீம் அல்லது குளிர்ச்சியானபானங்கள் மற்றும் கெட்டுப்போன அல்லது ஒத்துக்கொள்ளாத உணவு எடுத்துக்கொண்டபிறகு  இந்த நோய் நிலை ஏற்பட்டுள்ளதா என்பதையும் தெரிந்து கொள்ளவேண்டும். இது போன்ற காரணகாரியங்கள் சரியான மருந்தினை தேர்வு செய்வதற்கு பெரிதும் உதவுகின்றன.
  

4.     துயரரின் கடந்தகால நோய்தாக்குதல் (History of Previous Illness)கடந்த காலங்களில் அதாவது  துயரரின் குழந்தைப் பருவத்திலிருந்து தற்போதைய  நிலைவரை  என்னென்ன நோய்களால்  பாதிக்கப்பட்டுள்ளார் என்பதையும் அப்போது அவரிடம் இருந்த குறிகளையும், அந்த நோய் எவ்வளவு நாட்களுக்கு நீடித்திருந்தன என்பது பற்றியும் கேட்டுத் தெரிந்து கொள்ளவேண்டும். அதேபோல் அவர் இதயநோய், மூலம், குடல்பிதுக்கம் மற்றும் புற்றுக்கட்டிகள் போன்ற நோய்களுக்கு அறுவைசிகிச்சை செய்து இருக்கிறாரா? , ஏதாவது தோல்  சம்பந்தமான நோய்கள் ஏற்பட்டு இருக்கிறதா? அப்போது எடுத்துக்கொண்ட மருத்துவச் சிகிச்சைக்கும் இப்போதைய நோய் நிலைக்கும் ஏதாவது தொடர்பு இருக்கிறதா என்பது போன்ற துயரரின் கடந்தகால வரலாறு மிகவும் அவசியம். இத்தகைய விபரங்கள்  துயரர் எந்த மியாசத்தில் (சோரா,சைகோசிஸ்,சிபிலிஸ் ) இருக்கிறார் என்பதை மருத்துவர் புரிந்து கொள்வதற்கு உதவும். அவரது மியாசத்திற்குத் தகுந்த மருந்தையும் மருத்துவர் தேர்ந்தெடுக்க முடியும்.


5.     குடும்பவரலாறு (Family history): துயரர்  பாரம்பரியமான குடும்ப வியாதியினால் பாதிக்கப்பட்டுள்ளாரா என்பதை தெரிந்து கொள்ள அவரின் தந்தைவழி மற்றும் தாய்வழி மூதாதையர்களுக்கு இருந்த நோய்களைப்பற்றி தெரிந்து கொள்ளுவது மருத்துவருக்கு அவசியமானது. குறிப்பாக பரம்பரை பரம்பரையாக தொடர்ந்துவரும் நீரழிவு, மனநோய்கள்வலிப்பு, மேகவெட்டை,   உயர் இரத்தழுத்தம் , குறைந்த   இரத்தழுத்தம் மற்றும் தோல்படை போன்ற நோய் தாக்குதல் அவர்களுக்கு இருக்கிறதா ?, பிறவிக் குறைபாடுகள் தொடர்ந்து வருகிறதாஎன்பன போன்ற தகவல்களை கேட்டறிய வேண்டும். அதேபோல் துயரர் அவருடைய தாயின் கர்ப்பத்தில் இருந்த பொழுது தாயாருக்கு ஏற்பட்ட நோய்கள் , அவர் எடுத்துக்கொண்ட மருந்துகள் , சுகப்பிரசவமா அல்லது அறுவைச் சிகிச்சை மூலம் பிறந்தவரா? பிறந்தபொழுது மூச்சுத்திணறல் இருந்ததா? போன்ற தகவல்களையும் தவறாமல் பதிவு செய்துகொள்ளவேண்டும். இந்த விபரங்கள் துயரருடைய   நாட்பட்ட நோய்த்தன்மையின் ஆழத்தைப் புரிந்துகொள்ள உதவும். 

6.     தனிப்பட்ட வரலாறு (Personal history): துயரரின் தனிப்பட்ட வரலாறு நமக்குப் தெரிதும் தேவைப்படும். உதாரணமாக , அவருக்கு சரியான வயதில் பல்முளைத்ததா?, எந்த வயதில் நடக்க, பேசக் கற்றுக்கொண்டார்? , தாய்ப்பால் குடித்து வளர்ந்து வந்தவரா அல்லது அனாதைவிடுதியில் வளர்ந்து வந்தவரா? போன்ற தகவல்களையும்அவரது படிப்பு , செய்யும் தொழில் அல்லது வேலை, என்ன வேலை செய்கிறார் ( சுரங்கம்;மரஅறுவை;பஞ்சுமில்),  ஒரே வேலையை தொடர்ந்து செய்து செய்கிறவரா அல்லது மாறி மாறி பலவேலைகள் செய்பவரா? போன்ற விவரங்களையும் கேட்க வேண்டும். அதேபோல் துயரருக்கு குடிப்பழக்கம் , புகைப்பிடிக்கும் பழக்கம், டீ மற்றும் காபி போன்ற பானங்களுக்கு அடிமைப்பட்டிருத்தல் , திருமண உறவு எப்படி? அவருக்கு வேறு ஏதாவது தவறான உறவு அல்லது பழக்கவழக்கங்கள் இருக்கிறதா? போன்ற விபரங்கள் துயரரை நாம் சரியாக புரிந்து கொள்ள உதவும். துயரர் பெண்ணாக இருந்தால் எந்த வயதில் திருமணம் நடைபெற்றது? , எத்தனை குழந்தைகள் ?, சுகப்பிரசவமா அல்லது  அறுவைச்சிகிச்சையா?,  ஏற்கனவே கர்ப்பசிதைவு ஏற்ப்பட்டுள்ளதா? , தற்போது கர்ப்பமாக இருக்கிறாரா? போன்ற விபரங்கள் கட்டாயம் தெரிந்து கொள்ளவேண்டும். ஏனென்றால்  பெண்கள் கர்ப்பமாக இருக்கும்பொழுது  அபிஸ், செபியா மற்றும் சபினா போன்ற மருந்துகளை மிகவும் கவனத்துடன் கையாள வேண்டியது அவசியம். 

7.     மனக்குறிகள் ( Mental symptoms): மாமேதை ஹானிமன் மணிமொழி 211 இல் , ஏற்ற ஹோமியோபதி மருந்தைத் தேர்ந்தெடுக்க , துயரரின் மனக்குறிகள் பல சமயங்களில் முக்கியமானவையாக அமைந்து விடுகின்றன என்று குறிப்பிடுகிறார். ஆகவே , ஒவ்வொரு   மருத்துவரும் துயரரிடம் காணப்படும் கீழ்க்காணும் மனக்குறிகளுக்கு முக்கியத்துவம் கொடுக்கவேண்டும்.

a)    மனத்திட்பம் (Will). துயரரின் அன்பு (Love) , வெறுப்பு (Hates), மனவெழுச்சி (Emotions) , பிடிவாதமானகுணங்கள் (Obstinacy) , முரண்பாடு (Contradiction) மற்றும் அதிகம் பேசுதல் (Loquacity).
b)    அறிவாற்றல் அல்லது புரிந்துகொள்ளும் ஆற்றல் ( Understanding). துயரரின் மருட்சி (Delusion), வெறிப்பிதற்றலான நிலை (Delirium) , மாயக்காட்சி (Hallucination) மற்றும் நேரத்தை பற்றிய கணிப்பு (Time sense).
c)     மனத்தின் அறிவுத்திறன் (Intellect).  நினைவாற்றல் (Memory), ஒருமித்தகவனம் (Concentration) மற்றும் பேசுவதில்,எழுதுவதில் படிப்பதில் தவறு செய்தல் (Mistakes-talking, writing and reading).

இவற்றைத்தவிர துயரின் மனக்குறிகளை கீழ்க்காணும் பிரிவுகளின் மூலமாகவும் நாம் அறிந்து கொள்ள இயலும். அவையாவன;

a)    துயரரின் மரணபயம் (Death) மற்றும் தற்கொலை எண்ணம் (Suicide).
b)    மனக்கவலை (Grief), விரக்தி அல்லது அலைக்கழிப்பு (Vexation) , உணர்ச்சி புண்படுதல் (Mortification), உள்ளக்கொதிப்பு (Indignation) , கோபம் (Anger), கெட்ட செய்தி (Bad News) மற்றும் காதல்தோல்வி (Disappointed Love) போன்ற காரணங்களால் நோய்த் தாக்குதலுக்கு உள்ளாகுதல்.
c)     பயம் (Fear) , பதட்டம் (Anxiety) மற்றும் கடுந்துயரம் (Anguish).
d)    எரிச்சலடைதல் (Irritability), கோபம் (Anger), வன்முறைச்செயல் (Violence) , பொறுமையின்மை (Impatience) மற்றும்  பரபரப்பு (Hastiness).
e)    கவலைப்படுதல் (Sadness), அழுதல் (Weeping), மனகசப்பு (Despair)  மற்றும் துயரருக்கு ஆறுதல் கூறுவதால் ஏற்படும் விளைவு (Effects of consolation).
f)     மேலும் பொறாமை (Jealousy), ஞாபகமறதி (Absent-mindedness) மற்றும் மூளைக்கோளாறு (Mania)  போன்றவைகள்.

மேலும் மேற்கண்ட மனக்குறிகளை அறிந்து கொள்வதற்கு துயரரிடம் நேரிடையான  முறையில் கேள்விகள் கேட்பதைத் தவிர்த்து நுட்பமான வகையில் கேள்விகள் கேட்க  வேண்டும். உதாரணமாக உங்களுக்கு கோபம் வருமா?, அல்லது பொறாமைப் படுவீர்களா ? என்று கேட்பதற்குப் பதிலாக, உங்களது  சுபாவம் எப்படி? எந்த மாதிரியான உணர்வு ஏற்பட்டது?  போன்ற தொனியில் மருத்துவரின் கேள்விகள் இருக்க வேண்டும். அதேபோல் நீங்கள் இருட்டு,பேய் போன்றவற்றிற்குப்  பயப்படுவீர்களா? விபத்தைப் பார்த்தவுடன் அதிர்ச்சி ஏற்படுமா ? என்று கேட்பதற்குப் பதிலாக , எந்தெந்த சூழ்நிலைகளில் நீங்கள் பயப்படுவீர்கள் அல்லது பதட்டமடைவீர்கள் ? என்று கேட்க வேண்டும். அடுத்து, மனதில் பாதிப்பு ஏற்படும்  நேரத்தில் உங்களது நெஞ்சில் படபடப்பு இருந்ததா? மயக்கம் ஏற்பட்டதாஎன்று கேட்பதற்குப் பதிலாக,  அந்தச்சமயத்தில் உங்கள் உடல்நிலையில் எந்தமாதியான மாற்றம் நடந்ததாக நீங்கள் உணர்ந்தீர்கள் ? என்று கேட்க வேண்டும். அதேபோன்று துயரரின் மருட்சி, வெறிப்பிதற்றலான நிலை , மாயக்காட்சி  போன்றவைகளைப்பற்றித் தெரிந்துகொள்ள நேரிடையான கேள்விகளை கேட்கக் கூடாது. அவரின் பேச்சிலிருந்தும் , செய்கைகளின் மூலமாகவும் மருத்துவர் உணர்ந்து கொள்ளவேண்டும்.

அதே  நேரத்தில், துயரரிடம் மனக்குறிகள் சம்பந்தமான கேள்விகளை துயரர் ஆய்வு முடியும் தருவாயில் அதாவது கடைசி நேரத்தில் கேட்கக்கூடாது . அந்த சமயத்தில் அவர் களைத்திருக்கக்கூடும் அதனால் அவரது மனதின் ஆழத்தில் உள்ளுறைந்திருக்கும் உணர்வுகள் தெளிவாக வெளிவராது என்று மருத்துவர்.பிரே இஷேமித் (Dr. Pierre Schmidt)  குறிப்பிடுகிறார். ஆனால், துயரரின் உடல்சார்ந்த குறிகளை நாம் தொட்டுத் பரிசோதிக்கும் பொழுது அவரது உடலும் மனநிலையும் மருத்துவருக்கு முழுமையாக ஒத்துழைக்கும், அந்த நேரத்தில் நாம் அவரது மனம் சம்பந்தமான விபரங்களைத் தெளிவாகக் கேட்கலாம் என்கிறார் மருத்துவர். போர்லண்ட் (Dr.Borland).  இருந்தாலும் மருத்துவரிடம் மிகுந்த நம்பிக்கை ஏற்பட்டாலொழிய துயரர் தமது அந்தரங்க உணர்வுகளை பகிர்ந்து கொள்ளமாட்டார் என்பதும் உண்மை. குறிப்பாக பெண் துயரர்கள் ஆண் மருத்துவர்களிடமும் , மாறாக ஆண் துயரர்கள் பெண் மருத்துவர்களிடமும் இயல்பாக தமது தனிப்பட்ட  அந்தரங்க உணர்வுகளை பகிர்ந்து கொள்வார்கள் என்பதும், தமது பலவீனங்களை தனது  சக பாலினத்திடம் பகிர்ந்து கொள்வதை  அவர்களது  ஆழ்மனது விரும்புவதில்லை என்பதும் உளவியல் காரணமாக இருக்கிறது. ஆகவே, மருத்துவர் தனது முழுத்திறமையும் செலுத்தித்தான் துயரரை புரிந்து கொள்ள வேண்டும்.

8.     கடந்தகாலங்களில் எடுத்துக்கொண்ட மருத்துவ சிகிச்சைகள் மற்றும் அதன் முடிவுகள் (Previous treatment and results): துயரர் கடந்த காலங்களில் எந்தெந்த தொல்லைகளுக்கு உள்ளானவர் என்பதையும் , அதற்கு என்னென்ன மருந்துகள் எடுத்துக் கொண்டார் என்பதையும் , மருந்து எடுத்துக் கொண்டபிறகு அந்த நோய் முழுவதுமாக குணமாகி விட்டதாஅல்லது உள்ளமுக்கப்பட்டுள்ளதா? , தடுப்பு மருந்துகள் எடுத்து கொண்டுள்ளாரா? போன்ற விவரங்களை குறித்துக் கொள்ளவேண்டும். நாம் சரியான ஹோமியோ மருந்தினைக் கொடுக்கும் பொழுது அவரது பழைய குறிகள் திரும்பி வர நேரிடலாம். அப்பொழுது துயரர் நலத்திற்கு திரும்பி வருகிறார் என்பதை நாம் புரிந்து கொள்ள முடியும்.  . 

9.     விருப்பு மற்றும் வெறுப்பு (Desires and Aversions): அடுத்து துயரர்கள் எந்த  விதமான உணவு பொருள்களை விரும்பி எடுத்துக் கொள்கிறார் அல்லது வெறுக்கிறார்கள் என்பதையும் பதிவு செய்து கொள்ளவேண்டும். எனக்கு இனிப்பு பிடிக்கும் ; உப்பு பிடிக்கும் என்று துயரர் தெரிவித்தால் அது குறிகள் ஆகாது. ஆனால் ஒரு துயரர்  உணவின்   ருசியைப்  பார்க்கும்  முன்பே  உப்பை எடுத்து உணவில் சேர்த்துக் கொண்டால் அதுவே " உப்பை விரும்புகிறார்" என்ற குறியாக எடுத்துக் கொள்ளப்படும். அதே போல் மாமிசஉணவு விரும்பி சாப்பிடுவதால் மட்டும் அவருக்கு கொழுப்பின் மீது விருப்பம் என்று எடுத்துக் கொள்ளகூடாது. ஆனால் அவரது  மாமிசத்துடன் அடுத்தவர்கள் இலையில்  இருக்கும் மாமிசத்தையும் சேர்த்து எடுத்துக்கொண்டால் , அதுவே " கொழுப்பில் விருப்பம் என்று எடுத்துக் கொள்ளவேண்டும். இனிப்பும் அவ்வாறே!.   ஆகவே துயரர்களின் விருப்பு வெறுப்புகளை மிகவும் கவனத்துடன் கேட்டறிய வேண்டும்.

10.  தாகம் (Thirst): துயரரின் தாகத்தைப் பற்றி கேள்வி கேட்கும் போது , உங்களுக்கு தாகம் இருக்கிறதா? என்று கேட்கக்கூடாது. நீங்கள் எவ்வளவு தண்ணீர் எடுத்துக் கொள்வீர்கள் ? என்று கேட்க வேண்டும். துயரர் தனக்கு தினமும் தாகம் இருக்கிறது , ஒரு நாளைக்கு இரண்டு லிட்டர் தண்ணீர் குடிக்கிறேன்  என்று தெரிவித்தால் அது குறியாக எடுத்துக் கொள்ளப்படமாட்டாது. ஆனால் எனக்கு காய்ச்சல் இருக்கும்பொழுது நான் தண்ணீர் குடிப்பதில்லை என்று கூறினால் அது முக்கியமான குறியாகும். அதே போல் வெப்பமான பருவ நிலையில் நிறைய தண்ணீர் குடிப்பேன் என்று தெரிவித்தால் , அதற்குப் பெயர் நிறைய தாகம் என்று அர்த்தமில்லை . அது இயல்பான ஒன்று. அதற்குப் பதிலாக மிகவும் வெப்பமாக இருக்கும் பொழுது கூட நான் தண்ணீர் குடிப்பதில்லை என்று கூறினால்  அது முக்கியமானது.  அதே சமயத்தில்  துயரர் ஒரே தடவையில் இரண்டு மூன்று டம்ளர் தண்ணீர் குடித்தாலும் எனக்குத் தாகம் அடங்குவதில்லை என்று கூறினால் அதை முக்கியமான குறியாக எடுத்துக் கொள்ளவேண்டும். அதனால் துயரரின் தாகம் பற்றிக் கேள்விகள் கேட்கும்போது மிகவும் கவனம் தேவை. துயரர் சூடான தண்ணீரை விரும்புகிறாரா அல்லது குளிர்ச்சியான  தண்ணீரை விரும்புகிறாரா என்பதையும் , அவைகள் அவரது நோய்க்குறிகளை தனிக்கிறதா? அல்லது அதிகரிக்கிறதா போன்றவைகளையும் மருத்துவர் கேட்க வேண்டும்.

11.  தூக்கம் (Sleep) மற்றும் கனவுகள் (Dreams): தூக்கத்தின் போது துயரர் வெளிபடுத்தும் குறிகளும் சரியான மருந்தைத் தேர்ந்தெடுக்க நமக்கு உதவுகிறது. தூக்கத்தில் துயரர்கள் கீழ்காணும் செய்கைகளையும் , குறிகளையும் வெளிப்படுத்தலாம்;

a)    தூக்கத்தில் துயரரின்   உடல் , தலை மற்றும் கை,கால்கள் எந்தப்பக்கத்தில் ? எந்தமாதிரி இருக்கிறது?. துயரர் வயிற்றை கீழே வைத்து தூங்குவார்  அல்லது  கைகளை பரப்பித் தூங்குவார், தூக்கத்தில் தலையை இருபக்கமும் புரட்டுவார், அல்லது தலையணைக்குள் தலையை செருகுக்கொள்வார்.  
b)    தூக்கத்தின் போது துயரர் என்ன செய்கிறார்; உதாரணமாக, சிரிக்கிறார், திடுக்கிடுகிறார் , அழுதல்,பயப்படுகிறார், பற்களைக் கடிக்கிறார், கண்கள்/வாய் திறந்திருக்கிறது, குறட்டை விடுகிறார், தூக்கத்தில்   நடக்கிறார் மற்றும் வாயின் ஓரத்திலிருந்து எச்சில் வடிகிறது.
c)     தூக்கத்தின் தன்மை; தூக்கத்திலிருந்து எந்த நேரத்தில் , எதனால் விழித்துக் கொள்கிறார், எந்தநேரத்தில் தூக்கம் கெடுகிறது, தூங்கியபிறகு என்ன தொல்லைகள் ஏற்படுகிறது போன்றவற்றை தெரிந்து கொள்ளவேண்டும்.
d)    தூக்கத்தில் முழு உடலையும் போர்த்திக் கொள்கிறாரா? அல்லது சில குறிப்பிட்ட பகுதிகளை மட்டும் மூடிக் கொள்கிறாரா? என்று கேட்க வேண்டும்.
e)    எந்த மாதியான கனவுகள் ஏற்படுகிறது. கனவுகளுக்கும்  அவரது நோய்த் தன்மைக்கும் என்ன தொடர்பு இருக்கிறது என்பதையும் மருத்துவர் பொருத்திப்பார்க்க வேண்டும்.
f)     தூக்கத்திற்கு முன்பு  , தூங்கி எழுந்தபிறகு மற்றும் தூக்கத்தின் போது துயரருடைய பொதுவான தொல்லைகள் கூடுகிறது அல்லது குறைகிறது போன்ற விவரங்களை கேட்க வேண்டும்.

துயரரின் தூக்கம் பற்றியும் , தூக்கத்தின் பொது அவர்களைது நடவடிக்கைகள்  பற்றியும் அவருக்குத் தெரிந்திருக்கும் வாய்ப்பு குறைவாக இருக்கும் அதனால் அவருடைய பெற்றோர்கள் மற்றும் நண்பர்களிடம் கேட்டறிய வேண்டும் என்பது முக்கியம்.

12.  மாறுமைகள் (Modalities)  அதாவது தொல்லைகள் அதிகரித்தல் மற்றும் குறைதல்: துயரர்களுக்கு அவர்களுடைய தொல்லைகள் எந்த நேரத்தில்எதனால் அதிகரிக்கிறது  அல்லது குறைகிறது  என்ற மாறுமைகள்  துயரரை  நலப்படுத்துவதற்கு   பெரிதும்   உதவுகிறது. மாறுமைகளை கீழ்காணும் வகையில் அறிந்து கொள்ளலாம்.
a)    நேரம் (Time): இருபத்திநான்கு மணி நேர கணக்கில் , துயரருக்கு  அவருடைய தொல்லைகள் காலையில் அல்லது மாலையில்  அதாவது 3.A.M மற்றும் 3.P.M இல் தொல்லைகள் அதிகரிக்கிறது அல்லது குறைகிறது , மாலை 4 மணி முதல் 8 மணி வரை தொல்லைகள் கூடுகிறது (லைகோபோடியம்) போன்ற தகவல்களை குறித்துக் கொள்ளவேண்டும். அதே போல் பௌர்ணமி அல்லது அமாவாசையில் துயரம் அதிகரிக்கிறது என்பன போன்ற தகவல்கள் கல்கேரியா.கார்ப்., சிலிகா போன்ற மருந்துகளை தேர்ந்தெடுக்க உதவும். துயரர் இரவில் தொல்லைகள் அதிகரிக்கிறது என்று கூறினால் , அது இரவு நேரத்தினாலா?, படுத்த பிறகா?, அல்லது  படுக்கை சூட்டினாலாஎன்ற விபரங்களையும், மாலைநேரத்தில்    என்றால் , அலுவலகத்தில் உட்கார்ந்திருக்கும் நேரத்திலா அல்லது மதிய உணவிற்குப் பின்பாகவா என்றும் தெரிந்து கொள்ள வேண்டும். 
b)    வானிலை மாற்றங்கள் (Meteorological) : சூடு அல்லது வெப்பம் , குளிர்  ; கோடைகாலம் , மழைக்காலம் , குளிர்காலம் , பருவநிலை மாறுதல்கள், இடி மற்றும்  மின்னல், திறந்தவெளிக் காற்று , சுத்தமான காற்று போன்ற காரணிகள் துயரர்களுக்கு அவரது தொல்லைகளை அதிகரிக்கவோ அல்லது தணிக்கவோ செய்யும்.
c)    தொடுதல் அல்லது பரிசம்:  தொடுவதால் , அழுத்தி தேய்ப்பதால் இருக்கிக்கட்டுவதால் மற்றும் அமுக்குவதால் தொல்லைகள் கூடுதல் அல்லது குறைதல்.
d)    நிலை அல்லது உடல் அமர்வுநிலை (Position): துயரரின் தொல்லைகள் அவர் நிற்கும் பொழுது அல்லது உட்கார்ந்த நிலையில், தலையை கீழே அல்லது உயரமாக வைத்து படுக்கும் பொழுது அதிகரிக்கிறது அல்லது சமனப்படுகிறது .
e)    ஓய்வு மற்றும் அசைவு  ( Rest or Motion): அசைவினால், ஓய்வினால் , நடப்பதால், காரில் பயணம் செய்வதால் , படிக்கட்டுகளில் ஏறுவதால் அல்லது இறங்குவதால் தொல்லைகள் கூடும் அல்லது குறையும்.
f)     கழிவுகள் (Discharges): மலம், சிறுநீர் மற்றும் வியர்வை போன்ற கழிவுகளும் தொல்லைகளை அதிகரிக்கவோ அல்லது குறைக்கவோ செய்யலாம்.
                                                 
மேற்கண்ட வழிகாட்டுதலின்படி துயரர் ஆய்வை மேற்கொள்ளும் பொழுது துயரரின் ஒட்டுமொத்த குறிகளையும் நம்மால் தெளிவாக புரிந்து கொள்ளமுடியும். அத்துடன் துயரரின் உடலை புறப்பரிசோதனை செய்வது அவசியமான ஒன்று. ஹோமியோபதி மருத்துவர்கள் செய்யத்தவறும் விசயமும் இதுவே!. நாம் துயரரின் உடலை புறப் பரிசோதனை செய்யும் போது அவருக்கு இருக்கும் நகங்களின் சிதைவு, கழலைகள், மருக்கள், சொத்தையான பற்கள்உயர்இரத்த அழுத்தம், வேகமான இதயத் துடிப்பு போன்றவற்றை  அறிந்து கொள்ளமுடியும். துயரருக்கும் மருத்துவரின் மீது மிகுந்த நம்பிக்கை ஏற்படும் அதனால்  தமது  அனைத்துக்குறிகளையும் இயல்பாக பகிர்ந்து கொள்வார்.  இதைத்தான் சரியாக எடுக்கப்படும் துயரர் ஆய்வு பாதி நலப்படுத்தியதற்குச் சமம் என்று கூறுவார்கள். ஒரு 21 வயது இளம்பெண்ணிற்கு முதல் முறையாக மாதவிலக்கு  ஏற்படுவதற்கு பத்து நாட்கள் தாமதமாகிவிட்டது. அதற்கு முன்பு அவரது தந்தைக்கு  சிறிய விபத்து ஏற்பட்டு மருத்துவமனையில் சிகிச்சை எடுத்துக்கொண்டு வருகிறார். இது அந்தப்பெண்ணை பாதித்து இருக்கவேண்டும் என்று கருத வாய்ப்பு இருந்தது. ஆனால் அச்சம்பவம் தன்னை பாதிக்கவில்லை என்று அவர் தெரிவித்தார். இருந்தாலும் ஒவ்வொரு முறையும் தொலைபேசியில் பேசும்பொழுது தனது தந்தையைப்பற்றி அக்கறையுடன் விசாரித்துள்ளார். நான் அவரது தந்தைக்கு எந்தப் பெரிய பாதிப்பும் இல்லை என்றும் , ஓரிரு தினங்களில்  இயல்பு நிலைக்கு வந்து விடுவார் என்று  திட்டவட்டமாக விளக்கியபிறகு அவருக்கு ஆறுதல் ஏற்பட்டு முகத்தில் நிம்மதி தெரிந்தது. அவருக்கு ஆறு மாதங்களுக்கு முன்பு உணவு ஒவ்வாமைக்காக கல்கேரியா கார்ப் 200 கொடுத்திருந்தேன். அவருக்கு இப்பொழுது மருந்து கொடுக்கவேண்டுமா ? அப்படியென்றால் பாஸ்பரஸ் கொடுக்கலாமா? அல்லது பல்சாட்டில்லா தேவைப்படுமா? என்ற சந்தேகம் எழுந்தது. இருக்கட்டும் ! காலையில் மருந்து கொடுக்கலாம் என்று எண்ணி மருந்தில்லாமருந்து (Sac Lac) இரண்டு உருண்டைகள் மட்டும் கொடுத்து அனுப்பி விட்டேன். காலை ஏழுமணிக்கு அந்தப் பெண்ணிற்கு மாதவிலக்கு ஏற்பட்டுவிட்டதாக செய்தி வந்தது.  அவருடன் நான் நடத்திய உரையாடலில் திருப்தி ஏற்பட்டு அதன் காரணமாகவே அவர் நலமாகி இருக்கவேண்டும் என்று கருகிறேன்.


அதனால் ஒரு ஹோமியோபதி மருத்துவர் வெற்றிகரமான மருத்துவராகத் திகழ வேண்டுமென்றால் மரு.போர்லண்ட்  கூறியவாறு, கூர்ந்து கவனிப்பவராக (To Observe) , பொறுமையாக கேட்பவராக (To Listen), குறிகளை சரியாக பதிவு செய்பவராக (To Write) , நுட்பமாக கேள்வி கேட்பவராக (To Question) , நல்ல பரிசோதகராக (To Examine ) மற்றும் முழுமையாக ஒத்துழைப்பவராகவும் (To Coordinate)  இருக்க வேண்டும் என்பதை மனதில் இருத்திக் கொள்ளவேண்டும்.